فى مصر وبس

فى مصر وبس ..!! (1)

بقلم: ياسر يوسف غبريال

+ فى مصر وبس هناك اعتقاد ان الاقباط اسعد اقلية فى العالم .. موافق طبعا .. بس اكيد فى العالم الاخر ..
+ فى مصر وبس يوجد صحفى اسمه محمد الباز يقول ان سعر المتنصر خمسة الاف دولار .. ياه طب هزها شوية .. دا سعر الضحفى اليومين دول تقريبا كدة قلمي+ فى مصر وبس بيقولوا العمل عبادة .. وبقى عندنا عبادة ومعندناش عمل .. وبيقولوا النظافة من الايمان .. ولو شفتوا حال الشوراع هتقولوا ياه كل ده كفر ..ن ..قلمين حبر!!
+ فى مصر وبس يوجد اكرام لمعى الذى قال ان ربع الاقباط يعتنقوا الفكر الانجيلى وذلك بعد ان اجلسهم على جهاز كشف الفكر ..افهم لو قال ان فى مصر نحو عشرين طائفة انجيلية فهذا الشىء القابل للعد لكن الدخول الى فكر الناس فده شىء جديد ..كما انه قال انهم بيحضروا فى الكنيسة الارثوذكسية .. طب ليه بقى هما مش انجليين ولا خايفين من العو .. احب ان اقوله ان اكثر من نصف الانجليين بيتجوزا ويخلفوا ويموتوا ارثوذكسى .. يعنى بيعملوا الطقوس من زيجة ومعمودية عندنا لذلك اسباب عدة اتركها لفطنة القارىء و (فتنة ) اكرام .. + فى مصر وبس يوجد بطريرك وهمى اسمه ماكس ميشيل فى رمضان اللى فات قال لقد غسل الله قلبى بحب نبى الاسلام .. وفى رمضان ده قال ان جزء من ايمانى الاعتراف بالاسلام يا ترى فى رمضان الجاى هيقول ايه ؟؟ .. غالبا مش هيقول دا هيعمل .. هيعمل عمرة ..
+ فى مصر وبس يوجد مفكر قبطى اسمه كمال زاخر كل يوم الصبح قبل ما يفطر يطلع بيان صحفى واليوم اللى بعده يطلع بيان اخر يكذب به بيان امبارح ويقال والعهدة على الراوى انه مش بيجيله نوم لو لم يهاجم الكنيسة على الاقل مرة فى اليوم ..
+ فى مصر وبس تنحرق الكنايس بفعل الماس الكهربائى وسواها محصن .. الماس الكهربائى فى مصر عنده مخ وبيختار فى حين ان بعض البنى ادمين فى نفس البلاد ليس لهم مخ او اختيار ..
+ فى مصر وبس توجد كنيسة فى اسيوط تنتظر تصريح من ايام الملك فاروق وراح الملك وجه ملوك ولم يأتى التصريح ..
+ فى مصر وبس صلاة الاقباط بتصريح .. وبناء الحمام فى الكنيسة بتصريح وفى الاخر يقولك دول واخدين حقوقهم تالت ومتلت .. معلش شعب مزنوق فكريا ..
+ فى مصر وبس تعيين عضو مجلس شعب قبطى يصبح حدث .. وتعيين محافظ قبطى يصبح حدث جلل..اما نجاح قبطى فى مجلس الشعب فمش هيحدث اساسا ..
+ فى مصر وبس تلاقى اغنية بتقول متقولش ايه اديتنا مصر قول هاندى ايه لمصر .. وهى مصر مستنية تاخد مننا حاجة .. ايش ياخد الريح من البلاط ..
+ فى مصر وبس تم القضاء على الخنازير فى ايام قليلة .. وبقيت انفلونزا الخنازير .. كان الخنزير من دول بياكل 40 كيلو زبالة يوميا .. رحل الخنازير وبقيت الزبالة ..
+ فى مصر وبس .. كل منقبة عفيفة وكل سافرة مش كويسة حتى يثبت العكس وكل واحد مربى دقنه سنى وشيخ ..كنت مربى سكسوكة وجاءت العاملة فى الشغل تسأل على وهى لا تعرف اسمى فقالت عاوزة الدكتور ..
انهى واحد ؟
السنى الطويل ابو نضارة ؟
مفيش حد سنى بالوصف ده
لا سنى ومربى دقنه ..
مين ده ؟ مفيش..
لا فيه .. هو سنى.. بس الصراحة مسيحى ..
+ فى مصر وبس بناء الكنيسة يخلى الدنيا تقوم ولا تقعد .. وبناء كباريه يجعل الدنيا تقوم ..وترقص !!
+ فى مصر وبس لا يتم تعريف الفتنة الطائفية على انها فتنة ..ولكن على انها خناقة بين مصارين البطن .. ولا يوجد متطرفين بل مختلين عقليا .. ولا يوجد عقوبة للفتنة اكثر من بوس المشايخ للقساوسة اما عدسات المصورين ..
+ فى مصر وبس يوجد اكتر من 200 الف حالة طلاق سنويا ومثلهم عرفى ومثلهم حالات اجهاض وقدهم اطفال سفاح .. ونصهم زنا محارم ومع ذلك فكل ما يشغل بال الصحافة والاعلام والدراما وعاطف بشاى هو قضية طلاق الاقباط التى لا تتعدى نسبتها نص فى المية او اقل ..
+ فى مصر وبس يوجد نهر عظيم هو نهر النيل وقالوا عليه اللى يشرب منه يرجعله تانى .. يطبق المصريون هذه المقولة عمليا بيشربوا و يرجعوا .. يردوا الجميل من مخلفاتهم ..
+ فى مصر وبس اعلن اسانسير عمارتنا هدايته فقد تم لصق كمية ملصقات دينية عليه تكفى تلات حيطان وهذ جعل الاسانسير يرفض ان يصعد من غير ما تسمى عليه ..

Gobrial2003@yahoo.com